Нок нафақат мазали, балки саломатлик учун ҳам жуда фойдали мевалардан биридир. Унинг таркибида организм учун муҳим бўлган витамин ва минераллар, шунингдек, антиоксидантлар мавжуд бўлиб, улар иммунитетни мустаҳкамлаш, юрак-қон томир тизимини қўллаб-қувватлаш ва яллиғланиш жараёнларига қарши курашишда муҳим рол ўйнайди. Бундан ташқари, нок овқат ҳазм қилиш тизимини яхшилаш ва қондаги шакар миқдорини меъёрда ушлаб туришга ёрдам беради. Тадқиқотлар шуни кўрсатадики, мунтазам равишда нок истеъмол қилиш қандли диабет ва юрак касалликлари хавфини камайтириши мумкин. Қуйида нокнинг асосий фойдали хусусиятлари ҳақида батафсил маълумот берилади. 
Нокнинг саломатлик учун фойдали жиҳатлари:

– Ҳазм қилиш тизимини яхшилайди.

Нок таркибида эрувчан ва эримайдиган ўсимлик толалари мавжуд бўлиб, кунлик эҳтиёжнинг тахминан 20% ни ташкил этади. Улар ҳазм жараёнини фаоллаштиради, қабзиятнинг олдини олади ва ичак микрофлорасини яхшилайди.

– Қанд касаллиги хавфини камайтиради.

200 мингдан ортиқ кўнгиллилар иштирок этган тадқиқотларга кўра, мунтазам нок ва олма истеъмоли 2-тоифали қандли диабет ривожланиш хавфини 18% га пасайтиради.

– Яллиғланишнинг олдини олади.

Нок пўстида антиоксидантлар ва яллиғланишга қарши бирикмалар мавжуд. Улар саратон, юрак-қон томир касалликлари, диабет, Альцгеймер, Паркинсон каби касалликларнинг олдини олишда ёрдам беради.

– Юрак-қон томир тизимини қувватлантиради.

2019 йилда ўтказилган тадқиқотларга кўра, кунига икки дона нок истеъмол қилган одамларда юрак ва қон томирлари ҳолати яхшиланган.

Шунинг учун, организм саломатлигини мустаҳкамлаш учун нокни кундалик рационга киритиш тавсия этилади!