Қон босими кўтарилиши кўплаб инсонлар дуч келадиган муаммолардан биридир. Уни назорат қилиш учун доимий равишда дориларга эҳтиёж бўлмаслиги мумкин. Табиий маҳсулотлар, жумладан, майиз каби калийга бой озиқ-овқатлар қон босимини меъёрда ушлаб туришда фойдали саналади. Тадқиқотлар шуни кўрсатадики, соғлом турмуш тарзини шакллантириш ва тўғри овқатланиш юрак ва қон томир тизими фаолиятига ижобий таъсир қилади. Шу сабабли, организмга зарар етказмайдиган табиий усуллар орқали ҳам қон босимини барқарор сақлаш мумкин.

Майиз калийга бой маҳсулот бўлиб, бироз ошган артериал қон босимини туширишга ёрдам беради. Агар жисмоний машқларни канда қилмаслик, спиртли ичимликларни чеклаш, чекишни ташлаш ва яхши ухлаш каби соғлом турмуш тарзига риоя қилсангиз, шифокор кўрсатмасига биноан қон босимини кундалик маҳсулотлар ёрдамида меъёрда сақлаб туриш имконияти мавжуд. Шунингдек, таркибида натрий миқдори кўп бўлган маҳсулотларни чеклаш ва калийга бой озиқ-овқатларни истеъмол қилиш юрак ва қон томир фаолиятига ижобий таъсир этади. 

2022 йилда "European Heart Journal" нашрида чоп этилган тадқиқот шуни кўрсатдики, калийга бой маҳсулотлар (жумладан майиз)ни кўпроқ истеъмол қилган беморларда қон босими меъёрда ва юрак хасталиклари хавфи эса кам бўлади. Агар сиз майизни яхши кўрмасангиз, қон босимингизни назорат қилишга ёрдам берадиган бошқа калий таркибли озиқ-овқатлар мавжуд. Уларга банан, маракуйя, авокадо, турли сабзавотлар, дуккаклилар ва сут маҳсулотлари киради.