Жигар инсон танасининг энг муҳим органларидан бири бўлиб, у организмдаги турли хил жараёнларда бевосита иштирок этади. Ушбу аъзонинг соғлом фаолияти умумий саломатликни таъминлашда ҳал қилувчи аҳамиятга эга. Аммо жигар касалликлари баъзан кенг тарқалган симптомлар орқали эмас, балки ноодатий белгилар билан намоён бўлиши мумкин. Шифокорлар таъкидлашича, жигар хасталигининг дастлабки белгилари кўпинча бошқа муаммолар билан аралашиб кетади ва ўз вақтида аниқланмайди.

Жигар касалликларининг умумий аломатлари орасида тери ва кўз оқининг сарғайиши, қичишиш, тери тошмалари ва кўкаришлар мавжуд. Бундан ташқари, беморларда қориннинг юқори қисмида ноқулайлик ёки оғриқ, кўнгил айниши ва қусиш кузатилади. Елкада ёки орқа соҳада пайдо бўладиган оғриқлар ҳам ушбу касалликнинг белгилари бўлиши мумкин.

Жигар етишмовчилиги ҳуснбузарлар пайдо бўлиши, бўғимларда оғриқлар, ичак, ўпка, қалқонсимон без ва буйрак касалликларининг ривожланиши, ҳайз даврининг бузилиши каби ноодатий белгилар билан ҳам намоён бўлади.

Шифокорларнинг сўзларига кўра, жигар касаллиги билан оғриган беморларда умумий безовталик, иштаҳанинг йўқолиши, иситма, вазн йўқотиш ва ҳолсизлик ҳолатлари кузатилиши мумкин. Касаллик оғирлашганда эса оёқлар шишади, қорин бўшлиғи катталашади, варикоз томирлари кенгаяди ва нафас олиш қийинлашади.