Инсоннинг гавда ҳолати унинг умумий саломатлиги ва жисмоний қулайлигига бевосита таьсир қилади. Кўп ҳолларда биз кун давомида қандай ўтираётганимиз ёки тураётганимизга эьтибор бермаймиз, бироқ нотўғри ҳолатга ўрганиб қолиш соғлиқ муаммоларини келтириб чиқариши мумкин. Хусусан, қоматни букиш, тирсакка суяниш, бошни олдинга эгиш ёки оёқларни чалиштириб ўтириш каби одатлар умуртқа поғонаси ва мушакларга ортиқча юк тушишига сабаб бўлади. Бу эса бел оғриғи, мушакларнинг таранглашиши ва ҳатто ички органларнинг сиқилишига олиб келиши мумкин. 

Бошни олдинга эгиш

Кўпинча телефон ёки компютер экранига тикилганимизда бошимиз олдинга эгилиб кетади. Бу эса бўйин ва елка мушакларига ортиқча юк тушишига сабаб бўлади. Вояга етган инсоннинг боши ўртача 4-5 кг келади, лекин у олдинга эгилганда босим бир неча баробар ошади. Натижада мушакларда таранглик ва бош оғриғи пайдо бўлиши мумкин. Шунинг учун тана ҳолатини назорат қилиб, елкани текислаш ва вақти-вақти билан бўйин мушакларини ҳаракатлантириш муҳимдир.

Қоматни букиб юриш

Қоматни доимий букиб юриш умуртқа поғонасига ортиқча юк тушишига сабаб бўлиб, бел соҳасида ички органларнинг сиқилишига олиб келиши мумкин. Бу эса бел оғриғига ва жисмоний ноқулайликка сабаб бўлади. Гавда ҳолатини тўғри сақлаш учун орқа қисмга қўллаб-қувватловчи ёстиқ қўйиш ва умуртқа мушакларини мустаҳкамловчи машқлар бажариш тавсия этилади.

Компютер экранига жуда яқин ўтириш

Aгар компютер экрани юзга жуда яқин жойлашган бўлса, кўзга ортиқча юк тушади ва натижада кўз чарчаши, қизариши ҳамда бел ва бўйин соҳаларида ноқулайлик юзага келади. Мутахассислар экран билан кўз орасидаги масофа 50-60 см бўлишини тавсия қилишади. Энг яхши ечим – экранни қўл узунлигига мослаб жойлаштиришдир.

Тирсакка суяниб ўтириш

Иш ёки ўқиш вақтида кўпчилик бир тирсакка суяниб ўтиришга одатланиб қолади. Бу эса танадаги оғирликнинг нотекис тақсимланишига ва мушакларга ортиқча юк тушишига олиб келади. Натижада тирсак соҳасида оғриқ, таранглик ва ҳатто “теннис тирсаги синдроми” деб аталувчи касаллик юзага келиши мумкин. Ушбу муаммоларни олдини олиш учун тирсакларни курси суянчиғига қўйиб, гавда оғирлигини тенг тақсимлаш лозим.

Оёқларни чалиштириб ўтириш

Кўпчилик оёқларни чалиштириб ўтиришни одат қилган бўлса-да, бу нотўғри ўтириш усулларидан биридир. Бундай ҳолатда оғирлик фақат битта оёққа тушиб, қон айланиши бузилиши ва томир касалликлари юзага келиши мумкин. Энг тўғри усул – иккала оёқни ерга қўйиб, курсининг баландлигини қулай ҳолатга мослаштиришдир.